陪月 是必須的

作為一位兩年抱兩，湊夠一個「好」字的全母乳媽媽，可以告訴大家陪月是必須的。

而我，兩胎都用同一個陪月－敏儀

可以用到敏儀真的純粹是巧合！話說我原本請的陪月因為身體有急病，預產期前三星期左右先同我講做唔到我生意，因此我臨急臨忙透過媽媽group介紹搵下有邊個陪月仲有期又唔介意遠願意接，就係咁，機緣巧合之下，我簽約當日就見紅入左院生哥哥了！

以下幾個examples都令我了解到陪月真係好重要，所以當有左妹妹時，我即時問敏儀有冇期，好彩有咋！因為之後我介紹左4個朋友比佢佢都full左接唔到了。

1. 懷孕期間，有咩問題都可what's app問佢，陀妹妹時我瞓得好差，敏儀都有教我煲安神飲品改善情況。

2. 臨生產時，敏儀會睇下屋企有咩物品要添置，同埋準備炒米茶包比我響醫院飲。

3.  坐月時：

(i) 除左煮野好食，會根據我身體復原狀況選擇食材，仲會準備我一日三餐加下午茶（燉椰皇同蓮藕餅係我的最愛！）

(ii) 做野又快又爽手

(iii) 做完野會陪大仔玩

4. 疫情關係，大家特別注意衛生，敏儀入屋會換過全身衫褲，換新口罩，自備拖鞋圍裙，夏日炎炎都全日戴住口罩做野。

5. 年輕易溝通：敏儀好年輕就結婚同生小朋友，所以即使佢有豐富湊仔經驗，仍然好年輕，好易溝通，絕對冇代溝！

總結：

第一胎哥哥太demanding，我上奶慢，餐餐要補奶粉，我埋完身再密密泵，人好攰唔夠休息，加上生產完就搬左去新地方住，有一千個不習慣。雖然敏儀不會催乳按胸幫我增加母乳量，不過她有搵一位催乳師朋友幫我。

我亦十分感激她可以婉轉地教長老新一代照顧初生嬰兒的知識，將廚房執到企企理理，同埋加強家人的衛生意識。

第二胎，妹妹比哥哥乖一點，而我在醫院又勤力了一點點，上奶上得不錯，15日已經全人奶，我仲有多可以比埋哥哥飲！

不過哥哥正值最活潑時期，疫情關係冇得上playgroup，湊兩個真得很累，自己無左日夜追奶的煩惱，開始發現陪月的重要性。

我知道有好多陪月太遠唔接、二胎媽媽唔接、或者冇屋企人幫手唔接。

敏儀不但冇托手爭，而且快手煮好準備好飯餸，仲會幫我陪哥哥玩令我有時間休息、會幫手煮埋哥哥飯（哥哥仍然吃沒有調味的健康蒸餸，所以和我的坐月餐是分開煮的）、會準備好哥哥食飯枱、會幫手清潔哥哥玩具、會接疊埋哥哥的衣服、糖水又煮埋家人份量，仲有d好正的糖水做甜品！所以哥哥同陪月姨姨玩得好開心，大家食得好滿足，我highly recommend敏儀這個好陪月比大家！