[10w] 公立醫院第一次見助產士

Confirm bingo又book左公立醫院排期之後，因為距離去醫院仲有大約三星期，今次我獲安排week 10第一次見助產士，中間的日子我就book左私家照一次照聲波，至少我都要知係單胎定雙胎，同有冇心跳丫～

記住愈早用book HA排期，第一次見助產士的日子就愈早，往後安排見醫生等日子都早D，公家野資源有限，everything is on first come, first served basis, understand?

由於帶住肚中樹熊2號去醫院見助產士時正值疫情高峄，進入醫院同到婦產科樓層登記都要探熱，仲要填form問你過去14日有冇離開香港，如果有就唔好意思，要自我隔離14日先可以再番黎喇！

公立醫院第一次見助產士流程：

1. 到登記處，出示自己同老公HKID，book期紙（如果同我一樣用Book HA app, show個app佢睇就會幫你print out張紙），address proof，pregnancy proof（懷孕證明醫院會收正本，如有需要自己留個copy先）。

2. 登記完就去度高磅重量血壓，同時護士會比一堆書仔同小冊子你，之後坐埋一邊等叫名時可以睇電視／書仔。
電視入面都係介紹母乳餵哺有咩好處，唐氏檢查係咩，妊娠糖尿有咩需要注意同對BB有咩唔好，有咩症狀要入院分娩…etc

3. 終於叫名 ，入到房護士會問你第幾胎，有冇自己出去照超聲波，如果有就比埋片／report佢影印，再問你自己，老公同兩邊家族病歷史，有咩大病長期病特別醫學名稱的病最好自己mark低個名再比護士入番電腦做record。
然後護士會根據你background比唔同日期的紙仔你下次番黎覆診，問你有冇咩問題想問，需唔需要到診紙或病假紙，再問洗唔洗聽簡介會（因為上胎聽左，我就唔聽喇～）

4. 接著，大家拎住一疊預約紙同抽血file去另一樓層抽血就可以回家休息了。
到達抽血樓層，由於所有需要抽血同等取藥的人都在同一層（包括大量公公婆婆同長期病患者及行動不便的病人），所以人同細菌都比較多，大家要小心。不過職員見到你手上個file就知你係孕婦抽血，通常都會比另一條fast track queue你的。


最後，同大家講下手上護士比的紙仔會包括咩檢查：

• Week 11-13: 唐氏綜合症篩查（度頸皮）：

基本上個個都有期，除非你約第一次見護士個期時你已經過左week 13，咁就有機會冇喇～
當天醫院會幫你照超聲波度BB頸皮，如果準媽媽冇出去私家照ultrasound，今次好有可能就係唯一一次照喇！

BB頸皮再配合當日驗血結果，得出胎兒唐氏綜合症的風險指數，不過護士強調個指數只係check到高定低風險，而且唔係100% guarantee低風險等於不會有唐氏綜合症。

所以，有好多媽媽都會再自費出去做T21/ Nifty，價錢由$4500至$7000不等，除左會驗多D唔同遺傳病之外，仲可以早D知道係男寶寶定女寶寶架！

• Week 18-22: 結構性超聲波（照結構）：

只有極少數高風險孕婦可以有公立醫院安排的結構期，好似高齡、多胞胎等。其他孕婦護士通常會同你講：“比唔到結構期你，你要自己出去約期照喇！”

照結構當日醫生會幫你睇胎兒眼耳口鼻、心肝脾肺腎等內臟、手腳等齊全與否，如果胎兒健全，基本上最大難關已過，大家可以買定BB用品等佢出世喇！

• 見醫生：

我今次第一次見醫生日子在week 22，其實日子都係先到先得，睇醫生幾時有期，有準媽媽被安排week 28先見呀！

見完醫生通常下次就安排你4-6星期後見助產士／去健康院，有咩要問就趁今次問曬醫生了。

• Week 24-28: 妊娠糖尿測試（飲糖水）：

前一晚12點後唔可以食野，首先空腹抽血，飲一支／一碗糖水，飲完如果嘔要同姑娘講安排再飲過，然後唔可以食野直至兩小時後再抽血，最後會得到一包餅同鈣思寶比你補充番。

通常飲糖水都會用你全日時間，之後兩個working days都收唔到醫院電話即係pass喇！