樹熊仔是母乳寶寶，到現在歲半仍然飲緊母乳，不過本人並不是一位富媽，當身邊朋友一泵爆樽300ml時，我是60ml的，所以我絕對是窮媽一名。
以下是我一年半以來人奶路上的心路歷程，有點長，有誰共鳴：
樹熊仔出世頭幾日，我作為新手媽媽完全適應唔到，只係覺得好累好眼瞓傷口好痛，身旁樹熊仔又成日中氣十足大喊，我明明聽到醫院同房媽媽對住BB “shuuu…”一聲就收聲，最多只會小貓叫幾聲，但樹熊仔經常好似老虎咁大叫，全晚無間斷聽到唔同BB喊聲，我真的好崩潰。
加上乳頭開始變得敏感好唔舒服，姑娘又話我開始有奶要繼續密密埋身，我又學不到手擠奶的技巧，覺得好唔就手，我成日都覺得自己冇奶樹熊仔根本咩都啜唔到，所以我每次埋完身都會問姑娘拎水奶比樹熊仔飲。
久而久之，出院後都係埋完身補illuma，有時日頭有陪月我就唔埋身泵出黎，不過一直只係30ml，然而這時候的樹熊仔已經用樽飲緊60ml了。如是者，我依舊日夜埋身，埋完身樹熊仔補奶粉，我就再泵，無限loop… 為左避免聲音洪亮的樹熊仔嘈醒全屋人，我仲會alert到樹熊仔餓醒前自動起身坐BB床隔離等佢醒，所以基本上每日總休息時間都唔知有冇六小時，仲要係全日斷斷續續加埋。
頭兩星期，忍住姿勢唔啱啜損流血的痛仍然埋身，希望同樹熊仔慢慢互相學習，互相磨合。
然後，竟然出現石頭胸，有硬塊啜極都唔清，更出現了傳說中的小白點。
最後，一邊埋身時另一邊竟然滴奶，泵奶時又見到幼幼的奶柱，可以用到買左好耐的接奶神器了！
終於，約50日大的樹熊仔竟然自己戒左夜奶。
而我，依舊set alarm半夜起身泵奶。
對，每日半夜三更，對住奶泵，聽住大家鼻鼾聲，是我無限追奶的日子的寫照。
你可以話我固執，但我認為只要勤力，沒有做唔到的可能。
為左令自己做到全人奶，日日飲燉湯黑麥汁鈣思寶，再飲大量水同催奶茶，我仲會半夜起身power pump，即係泵20mins> 休息10mins> 再泵10mins> 休息10mins> 泵多10mins，一共60mins。每晚起身泵完入樽執好野到上番床，最快都要一個半鐘。
Power pump左兩個星期左右，我仍然三小時一泵，每日總奶量的確有上升（有好幾次下午一泵仲有120ml，對當時每泵90ml的我來說，超過100ml算是我的高峰了！），不過，我每泵仍然追唔到樹熊仔每餐奶量。
終於，在樹熊仔77日大，兩個半月時，我做到全人奶，樹熊仔終於係一個全人奶寶寶了。
終於，樹熊仔只係飲左兩罐奶粉，第三罐都飲唔曬就放到過期lu～初生奶粉開封後一個月內要飲完，未飲完都唔可以比BB飲架喇！
由唔記得幾時開始，我埋完身只係得番樹熊仔瞓前一餐需要用樽補奶；而我埋完身亦冇再泵奶。只埋身不用泵奶的日子真係輕鬆好多，因為我泵30mins，搞掂都成個鐘；埋身由初初飲下瞓下左右胸各20mins，到之後每邊10mins就放口，真係慳好多時間！
亦由唔知幾時開始，樹熊仔連瞓前補奶都唔肯飲了。
樹熊仔100日時，我真的好累好眼瞓好辛苦好想放棄。
我好想睇電視玩電腦搞到三更半夜先瞓，而唔係較鬧鐘三更半夜起身泵奶。
要放棄真係好易，奶粉方便快捷。
不過我最嬲最介意係冇人appreciate我。
要一句激嬲人奶媽媽，莫過於“人奶咪同奶粉一樣～”
唔好再講母乳同奶粉一樣！有好多研究都證實左母乳有抗體，母乳抗菌力比奶粉高，奶粉本來就存在細菌，唔係點會叫你要用70度水沖？！
埋身辛苦，但其實泵奶仲辛苦，因為泵完要煲水要洗要抹要消毒要入樽，仲要倒定好幾支幾安奶方便屋企人第二日成支拎去助熱黎餵樹熊仔。
而我知道寶貝樹熊仔半夜起身會自己瞓返冇喊，係因為我果時泵緊奶。
朝早寶貝仔起身即刻有得飲暖奶，係因為我響佢起身前半個鐘起身暖定支奶，佢7點起身我個鬧鐘唔係較7點係6點半就要準備定。
Could anyone put yourself
in my shoes?
4個月時，我放完產假要番工了。每日都要拎住一大袋野番工放工，又奶泵又奶樽又喇叭又冰袋仲有冰種加自己lunch box；仲要每日響公司泵三次奶，lunch響feeding room一邊食飯一邊泵奶，冇得約同事食飯；如果出去開會又要計定時間早D去附近商場排feeding room。
哩種日子我捱到樹熊仔6個月加固時，我就減左一泵，每日番工由三轉變兩轉。不過我並沒有儲到好多奶，我每日番工時樹熊仔只係飲緊我尋日泵出來的奶咋，餐餐清架！
作為在職母乳媽媽，我好感恩我的人奶路上，遇到一位超級好的老闆，她比我極大自由度，讓我每個工作天都可以有兩至三個時段去泵奶，每次開會前她都會關心一下我的泵奶時間，又讓我skip了一些“無聊”的會議。她的年代孩子是餵奶粉長大的，所以我真心很感激她對我這位母乳媽媽的支持！
終於，樹熊仔8個月時，我有人生第一包冰奶。
回娘家過夜亦不再需要帶人奶來來回回，每次離開前直接把多出來的奶放到冰箱便可。
11個月，一直維持半夜起身的我，變為瞓前泵清，終於可以一覺瞓到第二朝6-7am樹熊仔起身時直接埋身喇！
這時，我才意識到，原來，自己已經一年冇試過一覺瞓天光了。
原來，人瞓咁少都仲可以生存到，又冇病過。
原來，人的適應能力真係好強。
13個月，樹熊仔發燒入院，完全冇胃口唔食粥，怕他餓親只好比佢母乳放題，同時比多D抗體佢希望佢快D好番。在醫院陪瞓的我，在他出院後，也遇上我人生第一次塞奶。
14個月，我幫趁了同事用開的催乳師通乳。
之後在樹熊仔埋身同老公幫手按摩之下，用了一星期時間我的乳腺總算通番，不過胸上面仲有一粒橫強的白點仍舊存在。
15個月，我掛泵了。
樹熊仔日間午睡前只喝鮮奶，初初，家人說他會皺一皺眉表示味道改變了，不過好快他就習慣了。
終於，我可以換番個小手袋番工，唔洗再用背囊了！
16個月，我將冰箱中其中一包冰奶，自己試造母乳皂。
現在，18個月，樹熊仔睡前埋身的時間已經愈來愈短了。
我亦有同佢講樹熊2號出世之後要一齊分享。
我唔知佢幾時會自然離乳，不過見到佢仲好需要我，而我身體仲afford到時，我唔會逼樹熊仔的。
最後，想同大家講其實每個BB都好唔同，而每位媽媽人奶量都唔同。
正如樹熊仔一日飲六餐，每餐6至7安奶時；有朋友同齡的BB一日只係四至五餐，每餐飲5安奶就足夠。
樹熊仔未夠兩個月自己好叻叻戒左夜奶；亦有朋友到兩歲仲晚晚起身飲幾次夜奶。
樹熊仔食極唔肥生長線一直在50%；但有不少人奶寶寶變米豬蓮BB。
所以，凡事順其自然，唔好好似我咁逼得自己咁緊，放鬆心情就自然多奶架喇！祝所有人奶媽媽奶路暢通，長餵長有。
留言
發佈留言